正生書院遷校風波暫告平息，未知後事如何。正當鄉議局主席劉皇發狠批政黨借正生搶搭政治順風車之際，發叔所屬嘅經濟動力戰友梁劉柔芬（Sophie），尋日就同身兼足球總會主席嘅丈夫梁孔德借出私伙豪華遊艇，接載幾位立法會議員入芝麻灣探訪正生書院，同學生打籃球兼燒烤。對學生來說，真係受寵若驚。
Sophie與丈夫梁孔德、「大舊」陳偉業、「長毛」梁國雄、劉秀成、謝偉俊、張國柱及陳茂波，下午五時在中環碼頭集合出發，大半小時到達長洲再轉駁艇到正生書院，卓妮都一齊去湊熱鬧。正生校長陳兆焯帶住一班學生在碼頭接船，大家影咗張大合照後，陳兆焯因為要趕去開會，只交由學校老師代為招呼班議員。
蘇菲梁遊艇載同僚
今次大舊就掏腰包買咗一百五十個燒烤包，畀學生打完籃球後燒烤當晚餐，Sophie更加「出雞又出豉油」，借出百萬遊艇接載同事外，仲自製三百塊愛心牛油曲奇請正生學生食，兼且買咗三百條烤腸當加餸，讓學生享受豐富嘅燒烤餐。
Sophie一向關注青少年濫藥問題，亦講過好同情正生學生，早前為免同發叔唱對台，先至冇同其他議員一齊聯署撐正生，所以有人估佢今次探訪正生係為補鑊，但卓妮尋日問Sophie係咪支持正生書院搬到梅窩時，佢無正面回答，只係話：「我唔知，政府佢哋搞緊啦！」
不過，Sophie最後總結行程時話，今次探訪收穫好豐富，在場議員均認為唔好浪費現時長洲校址，因為可讓小朋友經歷刻苦生活，學習自力更生，建議政府考慮分兩階段處理戒毒學生問題，首階段先入讀正生戒毒，經改善後再轉到第二階段較正規嘅學校上課，相信居民會容易接受啲。
謝偉俊打籃球仆傷
曾經聯署撐正生書院搬到梅窩嘅「大舊」陳偉業，尋日態度轉趨軟化，佢話如果正生書院搬咗去梅窩，就會浪費咗長洲呢個咁好嘅地方。講番尋日場籃球比賽，賽果為四十比十九，班議員輸到離行離列，謝偉俊仲搞到跣低仆親，膝蓋流血要中途離場，全靠身形高大嘅大舊、陳茂波及劉秀成入波。事後幾個議員都話好耐無打過籃球，跣低嘅謝偉俊更加話三十幾年無玩過，當中只有劉秀成間中有練吓射籃，總之成班老弱殘兵啦！
卓妮