點樣一步登天呢？就咁，傳統噴漆係會排放有機化合物ＶＯＣ嘅，政府建議規管，用嘅係地球上最嚴格嘅標準，亦即係美國加州部分地區率先採用嘅ＶＯＣ含量限值。政府刊憲修訂《空氣污染管制（揮發性有機化合物）（修訂）規例》，將規管範圍擴大至汽車修補漆料、船隻漆料以及密封劑等等。

ＶＯＣ又係乜傢伙呢？講得太深驚大家唔明，簡單咁講啦，呢種揮發性有機化合物如果同氮氧化物產生化學作用，就會形成臭氧，一個人如果吸入過量臭氧，輕則眼睛不適，重則肺部穿窿。總而言之，ＶＯＣ係空氣污染嘅元兇之一，香港長期灰頭土臉烏卒卒，多得佢唔少。

好嘞，既然係污染物，政府規管都好應該啫，難得環保署一直懶懶閒閒，呢鋪終於洗心革面叻番次。冇人話環保署肯做嘢係唔啱，之不過咁，問題係做得太盡。話到明係地球上最嚴格嘅標準，講嘅當然係極之困難，困難到連歐洲先進國家都唔敢用，美國淨係得一個加州肯試，其餘四十九個州都要觀望觀望。難喺邊處呢？因為符合標準嘅漆料唔可以再係油溶性，一定要係水溶性，價錢貴幾倍唔在講，而且產量少之又少，想買都未必有得賣。

打個譬喻吖，人人都知道電動車比汽油車環保，政府可唔可以一步登天立法禁絕汽油車，全人類一夜之間改用電動車？梗係唔得啦，霎時之間冇咁多電動車供應，即使有供應，對唔住，你係冇可能搵到插頭充電嘅。假設你揸住一架電動車返工途中冇電，就當你神奇地搵到插頭嘞，請問要充幾耐電呀？閒閒地五粒鐘，等你充完電返到公司，你應該已經成為一條炒燶咗嘅魷魚！

講番ＶＯＣ，規管本來係啱嘅，但係你要諗下可行性有幾大，如果修例之後先至發覺全球缺貨，你咪捉蟲囉。所以話啫，做人要腳踏實地，循序漸進一步一步嚟，唔可以未學行先學走。就好似電動車咁，政府都要買幾部測試先啦，等環境局局長邱騰華過足癮咯，冇車毀，冇人亡，然後再慢慢從長計議。

對於呢個咁妙想天開嘅建議，最大反應係汽車維修業，佢哋認為新措施隨時會害到一萬名噴漆從業員飯碗不保。點解咁嚴重呢？因為車房要動用十幾二十幾萬元添置新設備，大型車房或者頂得順，小型車房就閉翳嘞，有機會執笠。即使有錢添置新設備，顧客肯唔肯幫襯又係另一個問題，現時為一架車噴漆大概一萬幾千，日後採用新產品咯喎，郁啲都要三、四萬，貴成咁，搵鬼幫襯咩！

立法會尋日舉行會議，就規管ＶＯＣ聽取業界意見。汽車維修管理協會代表就話嘞，環保署只係給予九日時間畀業界回應，根本諮詢不足。

吓？九日諮詢咁少？睇嚟，政府唔止妙想天開，簡直係患咗環保妄想症。既然咁妄想，不如索性禁用冷氣，禁用汽車，禁用燈泡，連發電廠都落閘放狗全面取締，全香港回復石器時代，咁咪藍天白雲返晒嚟囉！