前日馬季煞科，好多政商界名人入沙田馬場湊熱鬧，卓妮發現原來Stephen一家同兩個未來新抱都到齊晒，包括葉太Nancy、大仔瀚林（Hiram）及女友Connie、細仔瀚華（Ian）及女友Cindy，個個衣着執到正一正。Stephen一見卓妮，即時話有好嘢食介紹，只見侍應捧住一大碗有料粥送到佢面前，表面上點睇都係粥一碗，睇唔出有乜乾坤。

愛攝影即時拍照留紀錄

Stephen開估，話碗粥係佢自創嘅，主要用魚生枱啲刺身生滾而成，材料係鮮魚刺身、帶子、鮑魚、生蠔等，食落啖啖鮮甜味，佢仲即時攞部CANON G10數碼相機影低碗刺身粥做紀錄，等有機會推介畀各方好友。一碗粥用咁多貴價刺身煲成，就算無食落口都知道碗粥有幾鮮甜啦，Stephen將日本刺身研發成Fusion菜，簡直係開創飲食先河！

陳家強（左）當年做科大商學院院長時，曾經教過葉澍堃大仔女友Connie，兩人在馬會大董會所相認。

葉澍堃（左三）與太太（右三）、大仔Hiram（右一）及女友Connie（右二）、細仔Ian（左二）及女友Cindy（左一）喺煞科日一齊入場，仲巧遇陳家強（中）。（葉華英攝）

「未來媳婦」係傻強學生

Stephen介紹自創刺身生滾粥期間，巧遇財經事務及庫務局局長陳家強，兩人握手寒暄一番，期間陳家強仲同Hiram女友Connie相認，看來相當熟落。原來陳家強做緊科技大學商學院院長時，曾經教過Connie，加上Connie做過學生會副會長，間中都有同佢聯絡，所以大家一見如故，陳家強仲讚Connie讀書叻，咁幾叻呢？佢就謙稱話：「叻過我咁喇！」

唔講唔知，Stephen最近迷上攝影，帶住部CANON G10數碼相機愛不釋手，去到邊，影到邊，有好嘢就影低，同大家一齊分享。而Hiram同爸爸一樣，都係攝影發燒友，經常拿着相機周圍影，年初見過佢喺馬場沙圈幫女友Connie留倩影，最近佢迷上大大部嘅單鏡反光相機，仲同卓妮交換吓意見，睇吓買邊隻牌子相機好。咁又係，同女友影番啲靚相，留下美好回憶！

卓妮