早前一個細雨紛飛的早上，葵芳邨屋邨辦事處有四十多人冒雨排隊，為的並非「有嘢派」，而是要「趕交租」。撐着雨傘苦候的林伯無奈地說：「就算場雨再落大啲，都要排㗎！依家辦事處淨係得禮拜三上晝有得交租，我成七十幾歲，邊識周圍搵地方交喎！」

陳婆婆：「一個禮拜先開幾個鐘，梗係唔方便啦。明明有個辦事處又唔收租，都唔知房署想點！」	葉女士：「以前想幾時交租都得，依家就淨係一個禮拜開半晝，唔係咁易就到時間去交租。」	儘管房署提供其他交租途徑，但長者到辦事處交租的習慣難即時改變。

欠彈性添煩添亂

房署於去年一月起，分別在三十條屋邨實施「半天收租」，每周只會在星期三上午提供三小時收租服務，有關措施更於今年五月十一日起推展至另外九十四個屋邨。然而，有關措施實施以來，居民反對之聲不絕，直斥措施欠靈活及彈性，為無數居民添煩添亂。

居於油塘邨的陳伯過去數十年均前往屋邨辦事處交租，「真係過分，一個禮拜先得三個鐘可以交租，房署淨係叫我哋去便利店同港鐵站交，最弊就係印出嚟啲單會甩色，硬係覺得唔安心！」陳伯希望房署能體恤居民，「收回成命」。

「我哋其實都反映過好多次，叫房署唔好一刀切，起碼月頭嗰一個星期要日日開先啱！陳鎮源（房屋署署長）都認同㗎，不過最後又係行番呢個制度，都唔明點解！」公屋聯會主席王坤指出，政府不時會推出寬免公屋租金措施，便利店或港鐵站職員未必熟悉，長者又無從查詢，衍生問題難以估量。

便利店冇得查數

立法會房屋事務委員會委員梁耀忠怒斥房署「冇良心」兼不近人情，坦言每次見到長者交租「排長龍」，均大感心酸，「爭取過好多次、又反對過好多次，房署都唔理，堅持咁樣可慳錢，但有冇諗過便利店同港鐵站冇得查數，阿公阿婆點會放心去交？結果打風落雨都要排隊，開多幾日使死咩，咁做慳得幾多錢？呢個政府真係不知所謂！」

立法會房屋事務委員會主席王國興則認為，房署實施上述措施前未有充分諮詢居民及區議會意見，加上宣傳不足致問題叢生，建議房署增加宣傳，並考慮彈性開放或增加收租時間，回應市民訴求。

房署發言人指出，所有實施「半天交租」的屋邨附近均設有便利店、港鐵客戶服務中心或「地區繳費處」，該署實施此措施時已充分考慮住戶情況，如個別租戶繳付租金時遇到困難，可與分區租約事務管理處聯絡，該署會因應情況提供特別安排，如上門收租等。

■記者 許紹基