嘩！死得佢吖，海洋公園逆市加價都唔止，竟然一加就狠加兩成，同撳住搶冇乜分別！

不如先睇下點搶法。海洋公園話喎，由今年八月一日開始，成人門票將由現時嘅二百零八元，加至二百五十元；至於三至十一歲小童嘅門票，就由一百零三元加至一百二十五元。比較好彩嘅係三歲以下小童以及六十五歲以上長者，仍然係免費入場。

唉，今時今日經濟環境咁惡劣，唔係裁員就係減薪，你以為只有領匯先至咁無良逆市加租咩？原來海洋公園都唔執輸，佢哋都識得將個良心挖出嚟，掉落馬桶沖咗去。

海洋公園加價嘅理由非常戇居，佢哋解釋，受到金融海嘯同埋豬流感影響，五、六月入場人次大跌，本地旅客跌一成，外地旅客更跌咗三至四成，拖累全年入場人次，估計較去年跌咗百分之五。旅客少咗，收入少咗，所以就要加價補番條數嘞。

之所以話佢哋戇居，道理其實好簡單。大家睇睇西隧嘅慘痛教訓，呢條富豪專用嘅隧道因為收費零舍貴，所以車流特別少，車流少咯喎，佢哋唔去減價吸客，反而加價企圖補數，結果就愈加價愈趕客，造成惡性循環。

呢嗱嗱嗱，海洋公園確實係蠢到冇朋友，自己都識得話受到金融海嘯影響啦，旅客係因為冇錢先至唔幫襯你啫，正確做法係減價招徠吖嘛，咁咪可以薄利多銷囉。功夫茶都唔明主席盛智文諗乜嘅，又話係蘭桂坊之父，又話係商業奇才，點知竟然同樣係一個倒行逆施趕走旅客嘅笨蛋。

普通旅客梗係冇可能贊成海洋公園逆市加價㗎啦，旅遊業界又點睇？香港旅行社協會主席胡兆英曾經講過，如果加得太多，又唔提高旅行社佣金，可能將海洋公園列為自費項目，即係唔一定帶團友去玩。假如真係咁咯喎，飲鴆止渴嘅海洋公園隨時得不償失！

乜嘢叫做飲鴆止渴？即係咁，你好口渴，見到一樽毒酒，諗都唔諗就成樽吹喇叭飲到乾乾淨淨。飲鴆止渴嘅後果好明顯嘞，你唔係渴死，而係毒死。

海洋公園一旦戇居居毒死咗，香港旅遊業呢一碌經濟支柱就慘咯。你知啦，家陣香港一味食老本，話就話發展六大優勢產業，之不過十居其九都係吹水唔抹嘴嘅幻想作品，如果連旅遊業都拍烏蠅，二十萬失業大軍睇怕更加難望翻身。

講到拍烏蠅，自從美國總統奧巴馬當眾表演徒手拍烏蠅之後，中國有一位發明家送咗一套「環保捉烏蠅機」畀總統大人。不如咁咯，盛智文去內地訂購幾套，放喺海洋公園看門口，當係新景點都好吖！