就係一聲「衰公」的陰影，使我變成一個悲觀主義者，當老朽得知香港迪士尼將會擴建，增多三個全新園區，據商務及經濟發展局局長劉吳惠蘭強調，新增嘅「野礦山谷」、「迷離莊園」係全球獨有。好衰㗎！搞到我呢個悲觀者內心有陣騷動，好想有生之年每個生日，都與黃面婆喺呢個擴建後仍然是世上最細嘅樂園嬉春，次次玩嗰啲刺激嘅機動遊戲。人哋老布殊八十五歲生日都跳傘慶祝喇！

大家唔知記唔記得，九七回歸之後，香港經濟衰到貼地，當時特首董建華一心想以旅遊業振興香港，興建香港迪士尼，便可帶香港走出困局，政府便積極與迪士尼公司接觸，美國佬見特區政府愛得佢咁深，自然開天索價——興建樂園的投資成本大部分由香港特區政府承擔，整個投資項目涉及二百二十三億元公帑。心水清的計過數，即平均每個香港市民要畀三千多元。

如此巨額投資，特區政府只享有百分之五十七的股權，反而美國迪士尼公司只需投資約二十多億元，即一聲「老公」的呼喚，咁就享有百分之四十三股權和各項營運的專利費用。很明顯，這是一個不平等條約，基於尊嚴，老朽至今仍未有興趣踏足呢個樂園。

當年特區政府以為迪士尼會生金蛋，估計開幕初期每年接待逾五百萬人次，至二○二○年會升至一千萬人次；若然，估計四十年內為香港帶來一千四百八十億元淨額收益。可是，主觀願望被客觀事實打沉，入場人數一年差過一年。

如今，政府又把未償還貸款轉為股本，持股量減至百分之五十二，並天真、很傻的以為它是棵搖錢樹！