息影女星林青霞嘅丈夫邢李火原自去年在思捷環球退下火線後，一直歎世界享受人生，亦趨向平民化，事關近排見親佢入馬場，都好低調走到公眾席與普羅馬迷欣賞賽馬，仲同馬迷一齊排隊投注，身為馬主嘅佢，一點架子都冇，尋日亦唔例外，我哋見邢李火原到公眾席為愛駒「不言而喻」出賽打氣，佢話現時過着半退休生活，每日都會做吓運動，包括打吓高爾夫球及網球，保持健康體格。
馬會爭取在下個馬季增加五個賽馬日，問邢李火原會否考慮抽新馬？上次問佢就話無咁嘅打算，但今次問佢就話仲考慮緊，原來佢想多啲時間同太太林青霞去旅行歎世界。香港眨眼間回歸十二周年，問邢李火原點睇香港嘅營商環境？佢好厚道話，香港無論在軟件及硬件配套方面都適合營商，但現時內地經濟急速發展，走到大陸市場營商亦係一個唔錯嘅選擇。