02/07/2009

播放本新聞相關短片

政情:鄭明明夠勇赴韓變身

女人為咗靚,花費天文數字裝身亦在所不惜,美容界大姐大兼全國政協委員鄭明明早前花十幾萬元去韓國接受「回春治療」,抽脂兼打走皺紋,認真夠勇!

明明姐尋日出席七‧一酒會,見佢面色紅潤有光,一啲都唔似外婆級人馬,秘密原來係早前去咗韓國進行「自體脂肪幹細胞移植治療」,佢話呢種美容療法相當之新穎,香港仲未有醫生敢做,有冇效就見仁見智,不過手術過程絕對要捱啲苦。

明明姐話,人體內各組織分布唔同程度嘅幹細胞,脂肪內嘅幹細胞尤其豐富,醫生首先由佢個肚皮及臀部抽取脂肪,放入特製儀器內進行離心萃取、活化等程序,然後將幹細胞注入需要回春嘅部位,明明姐選擇注射手臂及面頰,過咗冇耐,全身皮膚滑咗、面上皺紋少咗,連聽力衰退問題都有改善,聽落真係好神奇,但係咪咁有效,真係要試過至知,相信唔係人人夠膽試嘞。

扮靚之外,明明姐近期忙於炒樓,佢話睇中新世界發展喺尖沙咀河內道嘅K11豪宅樓盤,早前巧遇新世界集團主席鄭裕彤長孫鄭志剛,即時報定名掃貨,志剛識做冇托手㬹,仲話早已當明明姐做VIP貴賓,到時可以優先揀筍盤喎。

陪你迎接高考放榜
詳情瀏覽on.cc《放榜無限分2009》

直擊人類豬流感最新疫情
詳情瀏覽on.cc《奪命流感》