我哋早前寫過，親中社團搞七一巡遊，工聯會會長鄭耀棠事先張揚，話請到禮賓府嘅人同四個局長首次參加巡遊，但實情係直至棠哥爆響口嘅一刻，特首辦同四個局長根本無應承過棠哥，棠哥變相夾硬抬咗人上轎。
巡遊尋日喺香港大球場舉行，結果特區高官全部出席完起步禮就拜拜，並無巡遊，印證我哋報道準確。
棠哥食咗政府嘅檸檬，初時惟有扮失憶回應話：「無，無，一直都話參加起步禮啫！」不過，作為公眾人物，公開言論覆水難收，棠哥當日講得好清楚，話禮賓府嘅人同埋發展局局長林鄭月娥、政制及內地事務局局長林瑞麟同勞工及福利局局長張建宗等四個局長會隨隊巡遊，包括「好似香港小姐咁繞場一周」，第二日多份報紙都有轉述，棠哥想「竄改歷史」，真係談何容易！
當到巡遊結束，大家再追問棠哥點解唔見高官巡遊，棠哥呢次記性好好，指政府方面早喺兩日前已經通知主辦單位，唔會參加巡遊；至於原因，棠哥叫大家自己問政府，總之強調高官肯嚟起步禮，主辦單位已經好滿足咁話，即係間接承認有邀請高官參加巡遊一事，只係食咗檸檬啫，呢句至係真話。