本文重點
尋日係香港回歸十二周年，市民巡遊嘅巡遊，遊行嘅遊行，行街嘅行街，總之各自各精彩。一年一度嘅七‧一酒會亦如期舉行，城中名人連早餐都未吃，晨早趕去現身，名媛闊太趁機展示名牌手袋及夏季新裝，男士都唔執輸，爭住大晒「荷蘭水蓋」。醫管局主席胡定旭及立法會議員黃宜弘分別喺心口掛上「金紫荊星章」，何鍾泰議員亦騷身價大晒銀紫荊星章。
盧文端一屋都係勳章
卓妮喺酒會見到新鮮出爐嘅「銀紫荊」得主、全國政協委員盧文端。佢自爆唔係首次得獎，二○○○年攞咗個「銅紫荊」，九七年又獲太平紳士銜頭，勳章多到放喺邊都唔記得。去完酒會，盧文端中午拉埋公子盧金榮入馬場，為愛駒「福建王子」打氣，想話拉埋頭馬來個雙喜臨門，可惜馬仔三甲不入，叫胡不成。
轉頭卓妮見到才女白韻琴捉住全國政協委員汪明荃傾到雞啄唔斷，到底有乜咁好傾？白姐姐話：「我讚阿姐有個好老公囉！」唔使羨慕人喇，你都有個才俊老公謝偉俊（Paul）喎？白姐姐即時擺出酸溜溜表情唔出聲，莫非佢對阿Paul早前同青島女子傳緋聞仍未下氣，點都唔肯認對方係好老公？
酒會嘉賓話咁快就四散，胡定旭晒完勳章後，轉頭換番個監場董事嘅襟章，趕入馬場為今季嘅煞科日監場，順便為愛駒「八逢九紫」打氣，不過最後都係同三甲無緣，未能趁馬季煞科前拉番次頭馬！