每年七一遊行，就係搞事三人組出動之時，肥佬黎同李漢奸喺維園會合出發，但兩人似交行貨多啲，李漢奸行到灣仔油站，就停低同人吹水，肥佬黎隻身前行至大有商場，亦頂唔順坐喺石壆打電話，原來急Call司機打救車佢走。佢就好啦，遊行當散心，攰就坐車走。

遊行原定三點半出發，身為「搞事三人組」之一嘅陳太就校啱時間三點零五分到達維園，佢戴住棗紅色膠框黑超同特大防曬帽，同女兒、女婿同孫女施施然到場，同記者嗲一輪後，三點二十分走入遊行龍尾等出發，點知噩夢由此開始。

民主阿婆一向自視甚高，以為泛民各黨都要臣服其下，但昔日嘅泛民同路人，尋日失晒蹤，只有一個唔再係立法會議員嘅「單雞」單仲偕陪咗佢一陣，但單雞因此畀黨友揶揄，笑佢係陳振聰。點解？大家諗吓啦。

等到面燶 插隊失敗

陳太等到面燶燶，助理急忙為佢打傘擋太陽，又一度嘗試走外圍插隊，但唔成功，焗住喺烈日下暴曬，最慘係好耐都唔見有泛民核心過嚟招呼佢，認真瘀皮。

其實陳太過往參加泛民搞嘅遊行，瘀嘢一籮籮，好似○七年參加「撐一二普選」遊行，行行吓中途走去恤髮，被市民鬧佢臨陣縮沙。尋日就有市民喺遊行人群中大叫：「忽然恤髮！」佢塊面又黑多兩錢。

陳太行咗兩粒半鐘，喺灣仔同金鐘交界離隊，臨走前仲發老脾，話自己喺遊行隊尾等咗兩粒鐘，批評警方疏導人流不力。

陳太被冷待，其實有迹可尋。遊行開始前，白鴿黨主席何俊仁同記者講，陳太無通知大家會嚟遊行，佢唔知陳太會唔會嚟喎。陳太一早高調宣布，會出席遊行，仁哥又點會唔聽聞吖！陳太成日騎劫泛民活動，今次搞成咁，睇嚟陳太以後喺民主路上會更加孤單！