燊哥同四太入場依舊前呼後擁，三太陳婉珍嘅上環古董店遇劫案件，卓妮一見燊哥，即時追問三太單嘢。燊哥話無乜損失，只係唔見咗條鎖匙，相信單嘢係啲細路仔所為，一切交由警方調查。問四太有冇學三太咁經營古董生意？四太笑笑口話：「啲咁古老嘅嘢我邊度會開吖，我開潮嘢家嘛！」乜嘢潮嘢呀？四太話：「開茶餐廳囉！」原來茶餐廳係潮嘢。

燊哥睇好樓市，三太陳婉珍上月就以一億元掃咗北角豪宅區十七個樓花，問四太有冇學三太咁大舉掃貨？四太就對住燊哥撒嬌兼呻窮話：「唉，我無乜錢㗎咋，睇何生買唔買畀我啦！」四太又話，原本打算七月起行去葡萄牙旅行，但遇啱九月澳門立法會選舉，要忙於「練馬」，所以唔去得。

大輝踢波發洩怨氣

恒生女大班梁高美懿尋日下午亦都同丈夫、女兒及媽咪一齊入場。梁太話，丈夫所屬嘅皇仁舊生會、皇仁飛駒團體有匹「皇仁俊駒」出賽，於是扶老攜幼入場為馬匹打氣，並且落注支持吓，可惜最終三甲不入。

尋日下午有多個團體搞遊行，入咗馬場嘅林大輝話，香港經歷咗咁多風浪，市民有怨氣在所難免，連佢都有怨氣，但佢話自己唔會遊行，會轉個表達方式，走去球場踢波，出一身汗當係發洩。燊哥離開馬場前亦都話：「遊行有乜好吖，得十萬人（遊行）之嘛！」

卓妮