事關當中有項「環保」產業好明顯唔係吹水嘢啦，呢嗱，膠袋徵費下月七日實施之後，去超市、連鎖個人護理店以及便利店買嘢想要個膠袋，盛惠五毫子。筆錢直接撥入庫房，小數怕長計，呢鋪政府真係豬籠入水，唔係優勢掠水產業係乜？

講開膠袋稅，係人都知係一場得啖笑嘅環保騷，環境局局長邱騰華尋日仲好樂觀咁預測，膠袋稅開展時唔會出現混亂，事關店舖嘅收銀處會貼上綠色背心袋標誌，單據亦會列出每個膠袋徵費五毫，佢仲誇下海口話會改變市民嘅消費模式，令香港成為綠色城市添。

綠色城市？咪笑大人個口啦！其實膠袋稅呢家嘢得唔得，只要睇吓人哋愛爾蘭吖，實施咗膠袋稅後，購物膠袋嘅使用量冇錯係降咗九成，之但係同期嘅垃圾膠袋銷量竟然狂升十倍，膠袋嘅總用量反而仲多咗添。

正所謂「你有張良計，佢有過牆梯」，查實喺膠袋稅仲未推出時，商家為免影響生意，已出蠱惑招避過徵費。好多產品已經預先搵膠袋包裝好，有商舖仲派冇手挽嘅膠袋以及「不織布袋」。呢啲「不織布袋」嘅膠原料比膠袋多十倍，結果好心做壞事，環保變成仲唔環保。

鬼咩，成個膠袋稅措施漏洞百出，邱騰華只係話會關注有冇商戶取巧避過徵費，當局唔會用太多嘅人力物力去巡查喎。咁樣講，即係話畀大家聽，可以繼續陽奉陰違，當膠袋稅冇到啦。

最搞笑嘅係，邱騰華仲好意思死撐話環保工作唔可以單靠立法管制，要公眾養成環保意識至得。嘿，真係有口話人，冇口話自己。

有大學曾經做過一個香港光害調查，收集二百多個地點嘅夜空光度數據，發現旺角、灣仔嘅夜空竟然比西貢、大嶼山光五百倍，而光污染之所以愈嚟愈犀利，街燈絕對係罪魁禍首之一。

好似話天水圍樂湖花園公園細細，人影都唔多個，竟然有成八十支燈，燈仲多過人。此外，馬鞍山海濱長廊一樣咁離譜，一條長廊居然有四百六十支燈，而且支支燈嘅亮度高過一百勒克斯。喂，散步啫，使唔使光到日頭咁呀？有專家認為二十勒克斯已經足夠有凸，呢啲唔係叫浪費係乜？

邱騰華話就話明白好多人關注全球氣候變暖問題，又話已撥款四億五千萬元，供屋苑申請進行能源效益審計及改善工程。弊在連政府部門都唔肯跟住做，反而帶頭浪費添，可見所謂節能政策，完全係做騷吹水。

冇計啦，邱騰華搞環保淨係得把口，相比濫用膠袋，改善空氣質素至係當務之急，但咁耐以嚟實質性嘅對策一件都搞唔成，一味度埋啲「停車熄匙」、「電動車」呢啲屎橋出嚟，難怪「藍天行動」搞咗幾年，藍天好似阿崩叫狗咁愈叫愈走啦。

計功夫茶話齋，不如搞「吹水稅」仲好，嗱，高官吹水即刻要徵收一半月薪，睇吓佢哋仲會唔會繼續噴口水污染香港！