擁有五十年歷史嘅蘇屋邨人才輩出，演藝界名人舊街坊有「冷面笑匠」許冠文及「歌神」許冠傑兩兄弟、Beyond主音黃家駒及黃家強等，政界就有立法會旅遊界代表謝偉俊（Paul）。蘇屋邨部分樓宇將於八月清拆，救世軍聯同一班街坊尋日搞咗個告別聚會，阿Paul就以舊街坊身份返去話當年緬懷過去，原來佢細個係反斗百厭星，試過玩到撼爆頭。
阿Paul係六十年代蘇屋邨嘅首批居民，居於荷花樓，一直住到十七歲離開香港赴澳洲讀書。阿Paul憶述，當年邨內好多空地可以周圍玩，總之乜都玩一餐，除咗中秋節玩煲蠟呢啲例行公事，平時又愛與鄰家小孩飛落樓梯，鬥飛得多梯級，仲試過激到玩走廊天花水管，當單槓咁玩，結果撼到頭破血流，嚇到以後都唔敢再玩，但回顧成長過程，非常快樂。
六、七十年代好多家庭都克勤克儉，阿Paul父母亦唔例外。佢媽咪每朝開保母車接送學生賺錢，下午就攞啲家庭手工返屋企賺外快，例如剪線頭及穿膠花，而父親最初在油站工作，後來先後轉職教車師傅及車行經紀，儲咗筆錢，八九年移民到美國定居至今。阿Paul話，父母都好想返蘇屋邨睇吓，惟父親行動不便，睇怕暫時好難實現嘞！