公民黨副主席黎廣德尋日為佢本《釋放香港》舉行新書發布會，一眾黨友去撐場兼祝賀，包括余若薇、梁家傑（袋巾）等，仲有公民黨新貴陳淑莊（Tanya）。Tanya帶埋男朋友叢鐵飛一齊去撐場，只見叢鐵飛嘅名牌上寫着「英雄」兩隻字，原來呢個係佢嘅外號！不過Tanya拍拖都顯得閃縮過人，佢一到場就同男友分開行，連買書都係一人各買一本，之後Tanya仲叫記者唔好影佢哋嘅合照，就算影咗都唔好登出嚟；既然拖得出嚟，講都係多餘。最後Tanya上台講咗幾句恭賀說話，就拿拿臨拉埋男友閃人。
講開先知，Tanya原來一向都欣賞米高積遜，對於米高突然離世覺得好可惜。一直有表演舞台劇嘅Tanya話，佢曾經同一班演員學過米高跳舞，不過就唔係學米高最出名嘅Moonwalk，事關太難學。Tanya好欣賞米高，但佢黨友袋巾傑就話米高唔係佢杯茶，仲話唔係佢嘅年代添。不過袋巾傑似乎Out咗啲啦，因為佢尋日先由我哋口中知道，《神探俏嬌娃》女主角花拉科茜過咗身，難為佢仲話自己小學已經有睇花拉做戲！