關心兩岸三地政治生態嘅人都知道，台灣政客最識包裝，台北市長郝龍斌前日起訪港兩日，宣傳九月舉行嘅台北聽障奧運會，今次行程雖然排得密麻麻，但聽聞佢本來打算尋日朝早由佢下榻嘅港島香格里拉酒店，過海到尖沙咀星光大道跑步，可惜撞正呢幾日打風兼落大雨，天公不作美，搞到佢無機會露一手。
郝龍斌尋日喺離港前舉行聽奧記者會，佢喺記招上變身台北生招牌，大讚台北多好嘢食，啲人又友善，又話台北喺資源回收、節能減碳等環保工作都做得好好，連上海世博會都搵佢哋去介紹，呢方面嘅經驗亦可以同香港分享，莫非佢暗示香港做得唔好？不過佢好識做，話比起上次佢○五年訪港，香港喺城市建設同管理有好大進步，好似八達通嘅經驗就好值得借鏡。睇嚟最值得香港政客借鏡嘅，係點樣做好政客。
可惜此行郝龍斌連食檸檬，前日佢同煲呔曾見面，一心請煲呔曾訪台，點知煲呔曾含糊其辭，答咗等於冇答。尋日郝龍斌向唐英年提出希望台港居民往來長遠做到互免簽證，點知唐唐只係話同意進一步簡化程序，都係答咗等於冇答。梗係喇，特區政府對台港問題一向如履薄冰，點敢隨便發言！