四叔捐出嗰兩億元人仔，主要係用嚟支持北大人文學苑嘅建設、公共教室樓嘅維護，同埋整個講座教授基金。為感謝四叔嘅捐助，將來人文學苑同埋公共教室樓，將分別命名為「李兆基人文學苑」同埋「李兆基樓」，至於個基金同獲得基金資助嘅教授，就分別會叫做「李兆基講座教授基金」同埋「李兆基講座教授」。呢個李兆基人文學苑佔地面積近二萬五千平方米，工程預計二○一○年底完成。

其實四叔一直熱心支持教育，○七年佢分別大手筆捐出五億元同四億元畀港大同科大，去年又捐咗一億元畀上海復旦大學，仲分別獲頒授復旦大學名譽博士、北京清華大學名譽校董及戰略發展顧問、同埋北大名譽校董三大名銜，今年五月四叔再度捐款四千萬元畀浸大嘅當代中國研究所做啟動基金添！