陳太尋日上咗港台，同一批青年政壇新秀對話，再次炒冷飯數落特區政府，炮轟煲呔曾獨攬大權同為所欲為，施政予人官商勾結同私相授受嘅感覺。談及多個公務員同紀律部隊團體不滿薪酬檢討聲言上街抗爭，做過公務員之首嘅佢就講到自己好心噏，話講到尾都係因為政府做嘢人治同冇規冇矩，所以政府施政要透明咁話。

不過，當班青年政壇新秀問起佢自己同泛民啲衰嘢時，陳太啲辯才就立即唔見晒。其中一條質問佢話，泛民咁多年來只係高喊要民主普選，但佢哋究竟為香港做過乜嘢實事？點解泛民只係識得批評、反對同搞破壞？另一條問題就牽涉到佢自己，質問佢喺回歸前同回歸後初期都做過政府第二把交椅，點解當時唔見佢爭取民主普選，直至退咗休先至識得出聲？

睇番香港回歸十年嘅歷史，呢兩位政壇新秀嘅提問真係一針見血、擲地有聲。不過，對於第一條問題，阿婆就顧左右而言他，只係話爭取普選不能靠政府，大家要多啲發言，但泛民為香港做過啲乜，佢索性避開唔答。至於第二條問題，阿婆竟然借咗聾耳陳隻耳，索性當聽唔到冇答到。一講到關鍵問題就變閃電俠，一味閃避，仲學人做咩「民主阿婆」呀！

應先搞經濟再講政改

不過講到年齡問題，就唔到佢唔認老。大家都知道，當年野心勃勃嘅佢，一直想爭奪特首寶座，可惜阿爺始終唔信佢。尋日有個年輕人問佢二○一二年仲會唔會選特首？陳太終於肯認老，佢話做特首要有好多精神同心力，佢年事已高，應該留番啲機會畀啲後生仔。梗係喇，連幾個名不經傳嘅青年人嘅問題都答唔到，想唔認老都唔得喇！

講到尾，面對金融海嘯同豬流感雙重打擊，大部分香港市民依家最渴望嘅，都係醫飽個肚同搵到份好工，其次就係啲高官同政客爭爭氣氣，唔好愈幫愈忙，乜嘢政制改革民主普選，遲啲再講都未遲，因此，無論陳太點樣瞓身硬銷都係嘥氣，「民主阿婆」都係慳番啖氣返屋企湊孫算囉。