真金不怕洪爐火，東方已根據資深大律師意見於昨日發出律師信，指《蘋果》嘅入稟狀嚴重缺乏充分理據。東方要求《蘋果》撤銷有關入稟，賠償東方因此而要付出嘅律師費。

啱喇，對付淫媒係唔可以手軟嘅。不如睇睇爛果報點講先。佢哋話喎，東方過去多個月抄襲其七宗「獨家消息」報道。哈哈，真係愈睇愈得意，乜消息都有版權嘅咩？正如法律界人士江炳滔話齋，「消息」本身無版權可言，根據其他傳媒嘅所謂「獨家消息」再作跟進報道，並不構成侵權行為。江炳滔並指出，若兩間傳媒嘅新聞內容來自同一消息來源，原則上係各自擁有版權，尤其對新聞界來講，互相引用消息來源更係慣常做法。

嗱，要判斷係咪侵權，其實好簡單，例如盜用相片係冇得拗嘅，東方有冇盜用爛果報相片呢？梗係冇啦，爛果報擺明係一心玩嘢，無事生非。

再聽聽另一位執業律師梁永鏗嘅意見。梁律師指出，傳媒有報道新聞嘅自由，若一間傳媒機構原本唔知某宗事件，其後透過其他媒介得悉有關內容，再用自己嘅文字報道出來，純粹係報道新聞，「完全不構成侵犯版權行為，沒有問題」。

簡單嚟講，通訊社或者電子傳媒報道咗一單消息，全世界都有權跟進報道，唔通咁都算係侵權？譬如話，甲傳媒率先報道深圳前市長許宗衡接受雙規，乙傳媒跟進報道，唔通你告佢侵權呀？唔通全世界除咗甲傳媒就唔可以報道許宗衡接受雙規呀？

東方光明正大，行得正、企得正，創立四十載未曾被控告侵犯其他傳媒機構嘅知識產權，更從沒有因此而支付過分文賠償。反觀壹淫媒就劣迹斑斑咯，侵權、抄襲、套料，花樣百出，無奇不有，粗略計算，過去十四年，壹淫媒先後近五十次擅自取用東方嘅新聞圖文、美術設計，壹淫媒多次賠償求和，金額累計近三十萬元。

事實勝於雄辯，壹淫媒旗下刊物侵犯東方版權已非自今日始。先有《壹本便利》於九五年因侵權而向東方賠償一萬二千元求和。《壹週刊》仲離譜，多次侵權人贓並獲，都係賠償求和。講到侵犯東方版權最猖狂則首推爛果報，早喺九六年十月，爛果報娛樂版擅自盜用當時東方旗下《東方新地》刊載嘅「王菲懷孕乘飛機」獨家照片及雜誌封面。但奇怪嘅係，雖然爛果報被判侵權罪成，法庭卻懲罰東方，要替爛果報支付巨額堂費，東方最後要上訴至終院至討回公道，但卻付出了時間及金錢損失不菲，擺到明係司法縱容爛果報，爛果報先至愈來愈離譜。

爛果報唔只盜用照片及封面，連東方嘅美術設計圖都照偷照用。九八年七月，爛果報擅自複製當時屬於東方旗下三份刊物附送嘅《香港新機場完全手冊》特刊內嘅美術圖設計，最終須向東方作出賠償。

江山易改，本性難移。壹淫媒多次侵權被斷正，但一次又一次嘅賠償都未能令佢哋收手，最近上演嘅「採訪無間道」，爛果報記者促致東方記者向其洩漏採訪資料，東方已入稟要求賠償。更離譜嘅係，壹淫媒旗下嘅蘋果網被揭發於○八年九月至○九年二月期間，至少三十幾次抄襲東方旗艦網站on.cc嘅新聞報道，部分更係百分之一百照抄照錄，東方已入稟高院要求頒發聲明及禁制令。

諗諗下，壹淫媒家陣之所以賊喊捉賊，「反告」東方，無非係想拖延東方控告爛果報嘅侵權案件，意圖淡化侵權行為啫。正如有法律界人士質疑，蘋果「反告」東方，係拖延案件嘅手法，同時讓法院將兩宗性質相同嘅案件一併審理，增加答辯程序，「拖到差不多時候，雙方都意興闌珊，自然就會選擇和解」。

唉，計功夫茶話齋，算罷啦，出陰招冇用㗎，玩報復都唔會得逞，有冇聽過邪不能勝正？劣迹斑斑嘅爛果報居然含血噴人反告東方侵權，講出嚟真係笑死街坊！