早前立法會議員謝偉俊（Paul）同白姐姐嘅戀情變成為城中熱話，一時又話分咗手，一時又話無咁嘅事，曝光率奇高。作為旅遊界立法會代表嘅阿Paul，早幾日就參加咗香港華商協會舉辦嘅二日一夜考察團，去澳門同中山考察。雖然今次名義上係半件公事，但難得可以忙裏偷閒，阿Paul就一於拉埋白姐姐陪佢一齊去，仲一齊摘荔枝，鏡頭下嘅佢哋，不知幾恩愛。
考察團其中一個活動就係參觀中山荔枝園，一班團友仲可以親身摘荔枝即摘即食添！當日陽光普照，阿Paul一身奪寶奇兵嘅裝扮，同白姐姐一齊戴同款嘅情侶帽，阿Paul仲好體貼咁幫白姐姐拉低啲荔枝，等佢摘得無咁辛苦。
除咗摘畀白姐姐食之外，阿Paul仲另外摘咗幾斤返嚟香港，專登帶畀立法會嘅同僚同議員助理食添，兩三箱荔枝話咁快就掃晒，大家覺得啲荔枝好唔好食就無人知啦，不過阿Paul專登摘畀白姐姐食嘅，就一定甜到漏啦！