警察評議會職方代表同政府就警察薪酬問題傾唔埋欄，引發警員破天荒計劃喺嚟緊星期日上街遊行，直接打擊煲呔曾嘅管治威信。自稱「公信力第一」嘅《明報》日前就引述「知情人士」，指呢次遊行係「明爭獨立薪制，實則力抗減薪」，質疑警察其實只係想搵個藉口唔想跟其他公務員同紀律部隊一齊減薪。
警務督察協會主席廖潔明尋日同公務員事務局局長俞宗怡開完會後，第一個唔係鬧政府，而係鬧啲「自命有公信力嘅傳媒」，利用啲所謂嘅「獨家消息」，「胡亂咁寫」，「抹黑我哋」。佢強調警察只係唔認同今次薪酬趨勢調查結果，以及要求警方有獨立嘅薪酬架構制度，如果政府肯成立仲裁委員會調查事件，即使最終結果係要警察減薪多過其他公務員，佢哋都願意接受。
究竟廖潔明鬧緊嘅係邊張報紙，明眼人真係一睇就知。關於公務員薪酬，啱啱喺一個禮拜之前，華員會先至點名指《明報》報道失實，估唔到該報冇吸取教訓，又畀人不點名批評，真係唔知佢乜嘢公信力嘞。