經濟不景氣，打工仔及老闆亦淪為失業大軍，兩餐都成問題。有見及此，中華總商會尋日宣布送出七萬張、總值二百一十萬蚊嘅「溫暖美食券」，經由社署派發畀低收入家庭，憑券可於七月一日起，去指定快餐店免費換到一碗熱飯及一杯飲品，等貧苦大眾開心吓。
發起呢個「中總愛心行動」嘅中總會長蔡冠深話，最初構思係想搞食物銀行，但計過數行政費太貴，靈機一觸拉埋飲食界合作，首家舉手響應嘅食肆就係吉野家，市民憑券可以換到面值三十蚊嘅食品。首批一萬張美食券日內派發，最快七月一日就用得。遲啲百樂門飲食集團及新光酒樓亦將捐出二萬張總值六十萬元美食現金券。
金融海嘯下做善事，蔡冠深話「撲水」最艱難，自己捐出三十萬蚊外，亦揼咗老友旭日集團老闆楊釗及金利來太子爺曾智明心口，佢哋各自捐出三十萬元，夾埋其他商家在內，合共籌到三百二十萬元，除撥出二百幾萬「派飯」外，亦計劃定期撥出十萬元予社署成立一個緊急援助基金，協助遭遇重大事故嘅悲慘家庭，首批五萬元善款已發放畀紅磡庇護工場遭鐵閘壓死女工嘅家人喎。