阿Paul日前同我哋講，由於睇唔通嚟緊大市點走，佢最近已將手上嘅過半數大笨象股份沽出。不過佢老友陳健波就堅持大笨象可以喺兩三年內升破一百蚊，如果滙控再跌，佢仲會再出手增持添！

阿Paul暫時唔沾手股票，就轉行抄外匯，喺十一蚊附近買入咗大批英鎊。不過佢自言今次出手其實唔係為咗賺錢，純粹係為佢喺英國讀緊大學嘅囝囝買個保險，皆因阿仔淨係學費已成廿萬港元一年，加上每年十二萬幾嘅生活費，如果唔趁低吸納番多啲英鎊，一旦匯價急升就會好大鑊。雖然話買英鎊唔係為賺錢，不過佢都賺好多喇，近日嘅英鎊大約係十二個七左右。佢又話如果大家係睇長線嘅，不妨考慮買番啲人民幣，總好過存錢喺銀行賺嗰幾毫子利息。