本報早前踢爆部分雷曼小組委員嘅出席率奇低，當中以建制派有最多懶蟲，醫學界梁家騮、自由黨方剛、中總黃宜弘、總商會林健鋒同獨立議員梁美芬，都曾經多次缺席小組嘅公開聆訊或閉門會議，直至最近報道出街後先至有所改善。

被揭蛇王呻冇癮

據聞部分被點名批評嘅委員私下大呻冇癮，一來佢哋相當不滿小組委員會啲會議又多又長，討論又唔夠聚焦，嘥時間兼冇意義，二來部分人根本一開始已經唔想加入，只不過係畀面政府先至勉為其難幫幫手，依家反而畀人質疑佢哋偷懶蛇王，心裏自然滿不是味兒，醞釀乾脆唔玩正式退出小組。不過當銀行界一收到有關消息，就立即出招游說佢哋留低，最終成功阻截到呢次退會潮。

須知雷曼小組委員會計劃喺立法會七月抖暑前，完成公審政府高官同兩個監管機構，十月復會後就輪到銀行高層受靶，屆時班委員決定傳召邊間同邊位銀行大班，會要求佢哋提交乜嘢機密資料，最重要係將來完成聆訊開始撰寫結論報告時，小組委員會到時點樣落藥同要求乜嘢人孭鑊，對銀行界影響極為深遠。

睇番小組委員會嘅現行組成，廿二名委員當中，表面上有十六人來自建制派，泛民主派只得六人，但查實建制派裏面嘅金融服務界詹培忠、獨立議員葉劉淑儀、以至外號怪醫嘅梁家騮同向來神經刀嘅梁美芬，都未必會畀面啲銀行，加上小組委員會主席何鍾泰講過要保持中立唔投票，一加一減下小組內真正嘅保皇派，其實只有一票優勢，名副其實係一個都不能少。銀行界為求自保，自然要全力出招補鑊箍票。