唉，毒海浮沉小孤舟，一心諗住泊碼頭上岸，點知岸上居民拒人於千里之外，確係見到都心酸。

功夫茶講嘅係戒毒學校正生書院搬遷事件。由於現有芝麻灣校舍簡陋不堪，原本兩個課室只能夠容納三十個學生，家陣超額收生至一百二十幾，非法僭建都冇可能為學生提供足夠空間，正生書院希望政府幫幫手，搵一個新校舍畀佢哋落腳，一齊洗心革面做番個乖乖好人。點不知，政府遲遲唔肯幫，一出手又愈幫愈忙。

拖咗兩年嘞，政府先至打算將梅窩廢置嘅南約區中學交畀正生書院，可惜吖，梅窩居民提出兩大理由激烈反對。第一個理由係選址錯誤，第二個理由係當地缺乏中學，小朋友跨區返學舟車勞頓，所以南約區中學唔應該用嚟戒毒，而係應該恢復為正常學校。

計功夫茶話齋，兩個理由來來去去其實只係一個，就係選址錯誤，居民抗拒戒毒學生。

前日嘅諮詢大會裏面，正生書院學生穿着整齊校服勇敢面對質詢，見到大部分居民手持反對標語群情洶湧，有人甚至高叫：「唔要吸毒仔、吸毒妹！」學生惟有沉默以對，頭愈耷愈低，眼愈來愈紅，部分女學生更加忍唔住喊咗出聲。

當然啦，你又唔可以過分苛責梅窩居民不近人情，戒毒學校始終唔係咁容易令人接受。歸根究柢，最大問題係政府處理失調。

首先，正生書院提出遷校已經兩年嘞，政府點解遲遲都唔諗辦法解決問題？其次，芝麻灣現有校舍可唔可以擴建呢？如果可以擴建，咁咪一天都光晒囉。仲有，你要說服梅窩居民接受戒毒學校，梗係要有充足諮詢啦，家陣唔係喎，急就章一嘢就將個波踢過去，你叫居民一時三刻點接受呢？好嘞，最後一個問題，假如正生書院唔可以搬去南約區中學，有冇另一個選擇呢？

話時話，政府之所以忽然熱心要幫正生書院遷校，其實係基於一個非常令人痛心嘅殘酷事實。學生吸毒問題愈來愈嚴重吖嘛，連一流名校都有學生公然集體索Ｋ吖嘛，號稱零容忍嘅禁毒處又唔知搞邊科，正正經經禁毒就唔識，居然搵個吸毒藝人去做禁毒大使。卒之就死火嘞，普通學校收生不足，戒毒學校人滿之患，政府咪要急急腳幫正生書院搵地方搬囉。

講到尾，政府先係禁毒不力，繼而後知後覺，然後諮詢不足，終於造成梅窩居民同正生書院嘅矛盾。邊個咁大膽，搞喊小妹妹？答案係失職官僚！

正生書院嘅學生其實係好值得同情㗎，佢哋願意改過自新，佢哋願意浪子回頭，佢哋願意發憤圖強，家陣就欠一個機會。

講到呢度，功夫茶都有少少眼濕濕。不如咁啦，如果正生書院最終無法遷入梅窩，呼籲市民包容學生嘅曾蔭權，開放禮賓府畀佢哋暫時落腳，直至搵到合適校舍為止！