港股近月強勁反彈，距離去年低位已經回升咗八成，不過唔少財經界人士都質疑今次升浪未必可以持續，前滙豐大班艾爾敦更加質疑股市已陷入瘋狂，呼籲大家遵守「Sell in May and go away」嘅傳統投資智慧，喺五月份沽貨離場。會計界立法會議員陳茂波（阿Paul）嘅睇法亦同佢差唔多，佢最近沽出手頭上超過一半滙控股份套現，話等大市前景清晰啲之後再重新入市搏殺！
阿Paul早前自爆喺高位買落唔少大笨象股份，一度變咗大閘蟹，好彩佢其後喺低位撈番多少貨，加埋供股折讓同今次升浪，整體嚟講總算可以打個和。
阿Paul尋日再同我哋講，最近股市雖然係咁升，但實質經濟就繼續走下坡，令佢睇唔通嚟緊大市會點走，加上自己做咗議員之後公務繁多，唔得閒日日
住個市，喺「有懷疑、揸現金」嘅原則之下，佢都係決定先減吓磅。不過佢強調投資決定係好個人嘅嘢，如果有人跟佢沽貨而最後賺少咗，千祈唔好搵佢算帳喎。