所謂好事不出門、醜事傳千里，好人做好事未必人人知。好似聖約翰救傷會（St. John Ambulance）咁，今年已經踏入第一百二十五個年頭，但都有人唔知佢哋嘅存在，難怪尋日佢哋搵齊各大小報紙、電台同電視台，搞咗個傳媒午宴，搞搞公關工作。呢一切其實都同兒科醫生李家仁有關。
身為聖約翰救傷會訓練及發展委員會主席嘅李家仁，尋日喺席上自爆，前排佢同傳媒朋友傾起，講起自己最近忙於聖約翰救傷會嘅工作，點知呢位傳媒朋友竟然反問：乜聖約翰救傷會仲喺度咩？直情畀咗李家仁一記重重嘅耳光！
尋日聖約翰救傷會嘅高層空群而出，同一眾傳媒打招呼，順便為救傷隊省招牌，一來講吓今年一百二十五周年嘅慶祝活動以及嚟緊會搞嘅活動，好似佢哋月尾推出紀念首日封，年底又會幫手參與東亞運動會，仲會爭取參與二○一二年倫敦奧運會嘅急救工作等。
睇番數字，救傷隊人數由○五／○六年五千五百幾人，一路跌到○八／○九年五千三百幾人，救傷會中人都慨嘆經濟唔好之故。不過佢哋強調，救傷隊啲救護車仍然維持平均車齡二至三年，十架車之中有兩架新車，其餘最舊嗰架只係五年，所以好少死火喎，言語間喺度暗寸政府救傷車經常死火。