尋日嘅烹飪比賽，食材由大會預定，有豬肉、西芹、紅蘿蔔同粟米，克勤揸起鑊鏟，始終唔及平時揸咪嗌口號咁自然。不過，處理食材方面佢就好熟手，識得用少少鹽、豉油同油醃到豬肉入味，先至落鑊，而且落料分量都幾準繩，克勤仔起火開鑊前後判若兩人，肯定有景轟。

果然無錯，問克勤仔點解煮餸咁叻有乜撚手菜式？佢老實自爆，其實自己一向廚藝麻麻，亦少入廚，但就有一個讀書時家政課攞高分嘅女友，咁近城隍廟，比賽前一晚咪叫女友幫自己惡補廚藝囉，仲預習過一次，所以咪咁熟手囉。克勤仔仲爆埋私隱，話平日拍拖都係同女友返屋企煮吓飯仔，話最欣賞女友嗰幾味薑葱炒蟹、街邊碗仔翅、蜜汁火方（金華火腿），湯水就花膠螺頭煲雞最正。