曾幾何時，「工展小姐選舉」熱爆全城，但時移世易，工展小姐鋒芒畀港姐搶晒，主辦單位廠商會決定同班工展小姐省番靚個招牌，尋日宣布成立「工展芳華薈」，性質有啲似港姐嘅「慧妍雅集」，搵班工展小姐做慈善大使，順便宣傳吓香港品牌喎。
廠商會會長尹德勝尋日帶同首屆「工展芳華薈」美女執委見傳媒，佢話「芳華薈」已經招收到廿幾位會員，仲歡迎歷屆工展小姐加入。講完美女後，尹會長意猶未盡再發言，不過唔係談風花雪月，而係反駁日前《明報》嘅報導話工展會參展費嚟緊將逆市加價百分之九，有牟取暴利之嫌嘅報道。
佢解釋話，新一屆工展會嘅會期將由二十三日增至二十四日，因為會期長咗，保安人手同燈油火蠟費用都相應增加，實際加價幅度只有百分之四點幾，冇百分之九咁多。佢又澄清話，廠商會係非牟利機構，就算工展會再賺多多錢，班會長同會董都冇一分一毫落袋，啲錢反而用嚟拓展商會發展同埋做善事，好似早前內地發生雪災及四川大地震，廠商會都有份捐錢，叫大家咪誤會佢哋從中掠水喎！
廠商會會長熱門候選人黃友嘉都有幫手解畫，講起會長爭奪戰，佢話會等到八月至出擊，期間只會低調地拉票，唔想搶咗尹會長風頭，認真識做。