拒畀政府擺上枱

新界問題一向複雜，唔係非黑即白咁簡單，錦綉大道使用權問題已經算易搞，只係涉及錦綉花園居民同貨櫃車司機，受影響人士範圍比較細，涉及地區亦唔大，上次發叔從中斡旋，成功擺平事件，總算為佢入行會嚟個立馬威。不過，今次正生書院嘅情況就無咁易搞，梅窩居民前日喺諮詢大會上，強烈反對書院遷入，聲厲樣惡，有人仲講到聲淚俱下，幾位正生女學生就被嚇到當場淚下，兩邊群眾情緒波動，各自表述，相信要在短時間內拉近分歧，唔係咁易。

據悉，政府本來要求發叔，安排相關部門官員上鄉議局，向鄉民詳細解畫，游說讓步畀正生書院遷入梅窩；政府咁嘅要求，即係又想擺發叔出嚟，充當和事老角色，但已遭發叔拒絕。理由好簡單，據了解，發叔覺得依家梅窩居民心中把火燒到㷫合合，正生書院師生呢個時候，心情亦難以平復，風頭火勢，呢個絕對唔係做架樑嘅適當時間，會吃力不討好，萬一有乜閃失，發叔更加無辜捲入是非爭端，呢條數點計都唔划算。

所以發叔寧願等風頭火勢過咗，雙方平靜落嚟，傾出個脈絡出嚟，先至介入，到時就算要佢召開鄉議局特別大會，都唔成問題，鄉議局尋日亦發出公開聲明，表明上述立場。

發叔今次處理正生書院風波，如履薄冰，小心謹慎，事關佢嘅角色，的確左右做人難，簡直就係夾心人，皆因身為鄉議局主席，梗係要代表鄉民利益啦，但佢同時又係行會成員，政府要將正生書院遷入梅窩，佢確實好難話唔撐政府。今次又睇吓佢老人家點拆呢個局！