六大慈善團體代表尋日約見班立法會議員茶敍，卓妮都貢咗去，身為保良局總理嘅蔡太及郭太都賞面出席。講起減價季節已到有乜掃貨目標，郭太話，每年例必去歐洲掃新衫新手袋，但呢排豬流感肆虐，搭飛機都避之則吉，佢嘅心水名牌係Giorgio　Armani行政人員套裝及Hermes手袋。

蔡李惠莉弄孫為樂

蔡太亦好錫身，寧願錯失入貨良機都避去歐洲，佢同唔少闊太一樣鍾情LV、Chanel及Hermes，好彩大女加敏近年開舖賣名牌手袋及衣物，只要蔡太睇啱邊件新貨，叫阿女代勞搜購就得喎。蔡太置裝亦別有心得，佢有御用設計師定期度身訂造新衫，每次出席Ball場都唔怕同人撞衫咁尷尬嘞。雖然去唔成歐洲，但蔡太一樣咁開心，事關佢個外孫女馬靄翹唔經唔覺已經一歲大，長得精靈可愛，婆婆抱住佢都唔捨得放手。

同場仲有保良局新丁總理羅梁芷珊，講起馬季就快收爐，佢旗下馬匹似乎戰績一般，無緣捧走大賽獎金，羅太笑言唔失望，話養馬只為消遣，輸馬咪當交學費喎。不過身為南華足主嘅老公羅傑承就有啲唔滿意，嚟緊馬季將派出兩匹新馬上陣，誓要收復失地。

羅梁芷珊對今季養馬成績唔理想唔失望，下季將派新馬上陣，捲土重來。 （何偉鴻攝）	黃定光（左）同吳文華相識於微時。	李三元話嚟緊會以粵劇義演及電影首映方式「撲水」。

李三元度橋「撲水」

卓妮轉頭撞見東華主席李三元，佢話金融海嘯下要度新招「撲水」，本月十八日將夥拍「鳴芝聲劇團」喺新光戲院搞個「粵劇籌款之夜」；同月三十日就有《冰河世紀》卡通片慈善首映，活動多籮籮，勢要網盡老中青三代嘅善長仁翁。

尋日茶敍仲有一個小插曲，話說立法會議員黃定光（象哥）肉緊地拉住立法會秘書長吳文華（Pauline）話要合照，原來象哥細個游水時認識Pauline爸爸，因此同Pauline有一面之緣，但兩人冇見面三十年，直至象哥入立法會後兩人再度相認，你話呢個世界係咪真係好細呢！

卓妮