莫講話氣候跳升一百度啦，即使好似近排三十度熱到跳舞，已經令人心思思跳入泳池玩玩水。之不過咁，功夫茶提提你，欺山莫欺水，尤其係公眾泳池嘅水，諗落都幾得人驚。

唔係嚇你，啱啱先至接連發生兩單泳池意外。第一單，十七歲少年喪玩跳水，結果頭部撼落池底重傷。第二單，兩個小兄弟冇大人陪同之下去游水，結果十歲細佬遇溺危殆，送院急救同死神搏鬥三日，最終都係不幸逝世。

喂，公眾泳池搞出人命喇，康文署署長周達明淨係識得講一句「非常難過」，有鬼用咩！

類似意外係咪無可避免嘅呢？梗係唔係啦，好似第一單咁，出事嘅係習泳池，唔准跳水㗎，如果救生員及早阻止，咁就乜事都冇。至於第二單，公眾泳池明文規定，小朋友要有大人陪同先至可以入去玩，如果當時職員冇走漏眼咯喎，同樣乜事都冇。

功夫茶手頭上仲有更加得人驚嘅數據。○六年全港公眾泳池發生嘅意外總數係一千八百幾宗，○八年數字急升近四成，去到二千五百幾宗。即係話，平均每日有七宗意外。甚至有救生員透露，一個泳池單日發生超過百宗意外都試過，直情忙到踢晒腳。

點解會有咁多意外嘅呢？泳客百厭當然係其中一個原因，之不過咁，如果救生員有足夠人手，肯定可以減少傷亡數字。

你睇吓人哋外國吖，一個泳池閒閒地有四至六個救生員。香港喎，大劑咯，康文署唔知搞邊科，竟然沿用二十六年前嘅編制，標準泳池只有三個救生員，習泳池同埋訓練池更加牙煙，淨係得一個救生員當值。功夫茶想問一問周達明，一個人兩隻眼，點樣可以同時兼顧兩個泳池呢？周署長咁叻，不如示範吓一個人管兩個署吖！

人手不足固然係大問題，經驗不足同樣係致命傷。香港救生員總會主席陳偉明估計，現時一千六百名救生員之中，只有一半係有經驗嘅。咁就死火嘞，原來康文署認為習泳池同埋訓練池冇咁易出事，所以專派冇乜經驗嘅初哥去睇檔。你話吖，一個初哥睇晒兩個泳池，泳客係咪冇保障？

仲有一樣嘢好抵死，康文署又係唔知搞邊科，香港拯溺員工會年年爭取泳池加裝自動心臟去顫器，用嚟為泳客急救，康文署餐餐耍手又擰頭，死都唔肯裝。大佬呀，自動心臟去顫器可以救番好多條命，點解咁冥頑不靈呢？咁同見死不救有乜分別？

所以話啫，講到尾都係康文署間接害死泳客，明知人手唔足夠，任由泳客冇人救。功夫茶忠告周達明，如果唔去提高公眾泳池嘅安全系數，閣下千祈唔好落水玩，因為好邪㗎，水能載「周」，亦能覆「周」！