尋日嘅房委會係周年特別公開會議，即係由各委員輪流發言，譚贛蘭就無份發言，惟有乖乖地坐足個半鐘頭，聽吓各委員嘅高見，聽到悶嘅時候就托吓腮又托吓頭咁沉思吓。散會之後，譚贛蘭成個人醒晒，走去同委員打招呼，寒暄一番。咁咪幾好囉，多啲交流，總好過又缺席喇。房委會下個月又要開會，唔知到時又見唔見到譚贛蘭出席呢？

上屆房委會分別喺去年六月十三日同七月十一日開過會，作為當然委員嘅譚贛蘭竟然都無出席，而根據房委會規定，地政總署署長可以委派副署長，以候補委員身份出席會議，但譚贛蘭並無咁做。地政總署當時解釋，譚贛蘭要主持會議，所以無去開房委會，而佢了解過嗰兩次房委會嘅議程，認為唔使派代表出席咁話。當時有立法會議員批評譚贛蘭嚴重失職，並無履行職責。公屋居民團體就話佢唔重視房委會，慨嘆房委會連橡皮圖章都不如。