觀塘區議會主席陳振彬（Bunny）向來對投資眼光唔錯，尋日佢出席由家庭議會舉辦嘅親子活動，講起近日樓市熾熱，佢語重心長勸大家咪心急買樓，理由係各國政府喺金融海嘯後狂掟錢救市，令市場一下子充斥大把水，水多得滯唔排除快將引發通貨膨脹，佢預測明年中，美國會加息嘅機會好大。
Bunny近排馬運亨通，愛駒「傳奇快車」日前爆冷勝出捧走百二萬獎金，認真恨死隔籬，以為Bunny會用筆錢環遊世界，點知佢慳住使，攞少少錢出嚟請家人同當日有份幫佢揀呢匹馬嘅「伯樂」食飯外，餘數全部撥捐母親名下慈善基金做善事喎。
講到同家人相處之道，Bunny嘅秘訣原來係每朝堅持六點半起身同兩個囝囝邊食早餐邊傾偈，閒來帶佢哋行山、游水，開心其實唔使花好多錢。提起錫家人，同場嘅民政事務局常秘尤曾家麗都分享心得，佢自爆係客家人，好重親情，得閒就會約埋九十歲嘅姑姐打番幾圈衞生麻雀，仲邊打邊「鬆章」，認真識做人。