入馬場一向規矩多，不管你幾有頭有面，每次行入沙圈賞馬都要跟到足。榮升做馬會遴選委員嘅莎莎老闆郭少明尋日同太太現身沙田馬場消遣，郭太以一身繡花牛仔衫褲Look再揹個名牌手袋，呢身打扮本來夠晒夏日色彩，可惜馬會職員認為佢衣着唔合適，唔畀佢落沙圈，一度令郭太鬼咁無癮。
留低嘢想落去攞番
卓妮尋日貢去馬場湊熱鬧，見到郭太企喺沙圈入口唔上唔落，原來係因為着錯褲。卓妮想話上前解圍，可惜馬會有規矩在先，邊個都無情講。郭太係馬場常客，冇理由唔知規矩，佢解釋話，本來唔諗住落沙圈，但突然醒起留低咗嘢想落去攞番。卓妮奇怪，郭太尋日根本未落到沙圈，到底留低乜嘢呢？郭生就畀佢行先一步喺沙圈賞馬，唔通郭太想搵嘅嘢，就係佢老公？
卓妮轉頭見到馬會大董范徐麗泰，佢繼續履行大董嘅職責，就係請食飯，尋日作為佢嘉賓嘅政界朋友係余若薇同陳淑莊呢對姊妹花。
同場仲有醫管局主席胡定旭，佢一入場就畀公關捉佢玩遊戲，叫佢投票選本年度最受歡迎馬匹，肥胡左諗右諗，最後貼咗隻「好爸爸」，話欣賞匹馬表現穩定又忠心。
大輝「更奇妙」斷腳
馬場尋日發生一宗意外，馬匹「更奇妙」喺賽事途中斷腳，咁啱得咁蹺，佢嘅主人立法會議員林大輝去咗踢波，未有入場為愛駒打氣，「更奇妙」最後難逃被人道毀滅嘅命運，大輝自責送唔到愛駒最後一程，有啲心酸，事關匹馬帶挈佢贏過二百九十幾萬獎金，扣除一百三十萬身價，總算有賺。繼「更奇妙」仙遊後，大輝名下另一匹馬「好奇妙」亦快將退役返澳洲養老，佢話暑假後會買番兩匹馬填補空缺都未定。
卓妮