呢，屯門海珠路一幅官地旁有兩棵樹，上面生滿晒一點點白色嘅嘢，離遠睇以為係發霉，之但係行近睇嘅話，即刻毛管戙。原來呢啲郁郁吓嘅白點叫吹綿蚧殼蟲，唔單止個樣夠晒核突，仲會分泌白色物質，唔好彩揩落人體皮膚嘅話，隨時痕到飛起。

仲有吖，喺上水新樂街一幅官地，成日有一大堆枯葉，逢親落大雨，就成為臭屁蟲嘅溫床，周不時飛入尋常百姓家生蛋，核突到嘔呀。有市民頂唔順，三月底致電１８２３政府熱線求助，點知拖足兩個月都冇人理。

直至本報轉介畀地政總署，佢哋上個月先至派人清理。功夫茶唔明，班官員按本子辦事，硬係要踢一腳至郁一郁，唔炳唔舒服咁，唔通佢哋有被虐待狂？

臭屁蟲嗰單就搞掂咗，屯門嗰兩棵樹呢？唉，又係要經本報轉介，當局至肯郁手滅蟲，不過，話就話滅蟲，但野火燒不盡，春風吹又生，唔夠幾日，樹木橫枝依然布滿晒吹綿蚧殼蟲。原來呢班官唔止懶，仲好鬼死蠢，有滅蟲專家唔搵，竟然搵承辦綠化工程嘅供應商搞，梗係搞到唔湯唔水啦。計功夫茶話齋，有咁嘅大懶蟲官員喺度照住，難怪香港通街都係害蟲，鬧市啲老鼠仲大過貓添吖。

好似話之前何文田巴富街有大樹冧落嚟，差啲壓死的士司機。康文署仲死撐話棵樹冇被白蟻侵蝕，亦冇冧樹危險。咁樣擘大眼講大話，連前線員工都忍唔住玩踢爆，畀埋相片證明嗰度啲樹木白蟻問題嚴重，可見康文署根本喺度隱瞞真相。

其實何止啲樹畀蟲蛀到空晒心吖，係人都知，香港出晒名污糟邋遢，話就話有所謂全城清潔大行動，但成班局長高官只係識得做騷，搞到好似歌仔所唱：「一日清潔騷，百日亂糟糟」，唔使幾日，好快又打回原形。

舉個例吖，○三年沙士疫潮爆發，高官防疫不力，又係搞埋啲清潔騷，仲喺十八區嘅黑點安裝一百組閉路電視監察垃圾蟲添，點知疫情過咗就關人個關，呢啲閉路電視即刻冇晒做騷價值，民政事務總署話由於後巷衞生情況理想，拆都拆唔切。

唔係講笑，當局自己都承認目前全港有多達八十六個衞生黑點，香港直情可以改名做「臭港」。咁嘅衞生情況都叫理想？鬼咩，求其去一條後巷睇吓就知，垃圾堆積如山，簡直就係垃圾崗。

豬流感踢極唔走，各種古靈精怪傳染病無日無之。歸根究柢，原因得一個，就係成個政府管治架構畀大懶蟲蛀到爛晒，香港想唔病都幾難！