本文重點
呢幾日不斷有學校遭踢爆發生學生集體濫藥，尋日本報又揭發名校中學生喺學校集體索Ｋ。面對毒禍迅速蔓延校園，教育局局長孫明揚尋日朝早上電台節目講完臻美事件後，唔肯回應青少年濫藥情況，中午佢出席完教師中心廿周年慶祝酒會後，眼見大批記者等佢回應校園濫藥事件，佢竟然繼續施展金蟬脫殼之計即刻走人，將個波推咗畀教育局副秘書長葉曾翠卿。
葉曾翠卿耍太極
不過，葉曾翠卿接過波後，就嚟一招耍太極，佢一開始就話：「我哋非常關注青少年問題，唔單止係濫藥，其他行為問題我哋都擔心。」跟住仲花咗大量唇舌宣傳教育局做咗啲咩，又話希望學校搞多啲可以提升學生正能量嘅活動，一切都講到好正面咁。葉太仲繼續幫學校講好說話，話有同啲學校接觸，發覺學校喺宣傳、預防工作方面，其實都好有心去做；既然局方同學校都做咗咁多嘢，點解仲有咁多青少年濫藥問題呢？睇怕局方同有關方面都應該好好檢討至得！