醫學會前會長兼現任醫學會酒後駕駛問題專責委員會主席蔡堅，尋日出席一個貨車安全駕駛運動開展禮時，同藝員喬寶寶一齊做棟篤笑，以佢一向嘅風趣幽默，糾正喬寶寶演繹嗰種酒後唔臉紅就揸得車嘅睇法，呼籲司機大佬勿酒後駕駛。蔡醫生肉緊演出，交足功課。
咁蔡醫生有冇酒後駕駛嘅經歷？蔡醫生話，自己平時唔多飲酒，最多一個月飲一至兩次餐酒，通常開醫學會嗰陣飲，每次最多飲半支白酒咁上下，但為咗避免不知不覺間犯法都唔知，佢飲酒就算一滴都好，就絕對唔揸車，為免麻煩其他人，通常係搭的士返屋企。
不過蔡醫生從實招來，話自己未試過酒後駕駛，但佢個醫生囝囝就有咁嘅經歷。原來佢個仔讀緊醫嗰陣，試過酒後駕駛，最終被佢發覺。蔡醫生話，醫生酒後駕駛除咗同普通人一樣要受法律制裁之外，仲要被醫委會處分，簡直係雙重懲罰，身為好爸爸嘅佢，梗係要捉住囝囝省咗一餐，好彩囝囝聽話，以後學識泊低架車先去飲酒，飲完搭的士返屋企。