每年一月到五月，就會有鋪天蓋地嘅母親節宣傳，想唔記得都難，反而六月嘅父親節就相形見絀，有時都戥各位爸爸唔抵。由自由黨發起嘅齊抗金融海嘯大聯盟，尋日就喺商場搞咗個「父親節、快樂Daddy」活動，召集人方剛請來立法會同事陳鑑林（橄欖）、李華明（Fred）同梁家傑（Alan）做嘉賓，大送禮物之餘齊齊向市民派消費券，不知幾熱鬧！
大會尋日送嘅父親節禮物認真特別，Fred抽到張六合彩飛，佢成世人未買過六合彩，今次係第一次；方剛抽到支健康飲料，講笑話好在唔係「紅牛」；Alan竟然收到個電器拖板；橄欖抽中個旅行用鬚刨，算係最實用。不過四個爸爸都話父親節唔及母親節咁受重視，Alan仲開口叫大家唔應該歧視父親節添，大家紛紛喺台上多謝自由黨主席劉健儀咁有佢哋心。
問過先知，原來佢哋屋企好少慶祝父親節。橄欖話屋企以前唔會慶祝父親節，依家囡囡大咗，開始會傳個父親節短訊畀佢。問方剛最想收到咩父親節禮物？佢話囝囝喺上海，用唔到消費券買禮物畀佢；至於買禮物都係一時時，佢唔敢有期望，怕失望。最積極嘅可算係Alan，佢話會放疊消費券喺囝囝書枱，等佢心領神會喎。四位議員仔女睇到呢段報道後，好行動喇！