由四十五條關注組一批大狀組成嘅公文袋，創黨時為壯大聲勢、洗脫「大狀黨」形象，特意搵咗對○五年政改方案投下關鍵性反對票嘅Mandy、以及形象草根嘅社福界立法會議員張超雄加盟，分別擔任該黨嘅司庫同副主席，有人仲一廂情願咁力捧佢哋，企圖取代日漸衰落嘅民主黨，使公文袋成為泛民主派嘅龍頭大佬。

點知公文袋個如意算盤打唔響。佢哋首先喺○七年區選大敗而回，其中Mandy喺入黨前贏番嚟嘅黃大仙區議會議席，入黨後反而輸咗。之後嘅○八年立法會選舉，又爆出另一公文袋執委容詠嫦同Mandy爭位出戰會計界功能組別嘅鬧劇；雖然公文袋最後都係支持Mandy角逐連任，但佢同公文袋嘅關係已經大不如前。Mandy落選之後，佢嘅司庫席位更加被容詠嫦取代埋。同樣落選立法會嘅張超雄亦由副主席貶咗做普通執委，真係人情冷暖、世態炎涼！

孖張超雄搞新組織

Mandy最近同張超雄及另一前泛民立法會議員醫學界嘅郭家麒，先後創立名為「關懷香港」同「關懷中國」嘅組織，擺明不滿被公文袋冷落，被迫另起爐灶希望闖出一條生路。尋日Mandy仲正式遞信申請退黨，黨魁余若薇想打電話挽留佢，佢亦故意熄機唔覆，擺明係去意已決，講多無謂！

有熟悉Mandy嘅人士分析，Mandy至今仍堅信可以喺二○一二年搶番會計界個位，但公文袋好明顯唔係咁諗，就算唔係改派容詠嫦，佢都好難跑出，所以Mandy眼見前景黯淡，先至下定決心退黨，與公文袋決裂。如果真係咁樣，泛民下屆就好可能有超過一名候選人參選會計界，互相分薄票源，到時肯定變成鷸蚌相爭，漁人得利，最終得益嘅自然係建制派嘅現任會計界議員陳茂波。