恒基主席「四叔」李兆基囝囝李家誠（Martin）與太太徐子淇繼兩年前誕下「金叵羅」大女晞彤（Leanna）後，上月中再誕下第二名千金，眨吓眼十日後就即將滿月，惟名字一直未有曝光。卓妮尋日就有幸從Martin口中得知次女叫「李晞兒」，但英文名仲諗緊，Martin大讚「晞兒」個名好順口，得意又可愛，仲預告太太徐子淇抖完會再追多個添！
東方日報慈善基金協辦「五星之旅」
東方日報慈善基金與百仁基金尋日舉辦「五星之旅」活動，邀請數十名清貧學童享用豐富下午茶自助餐。Martin貴為百仁基金委員，出錢又出力，不但贊助場地及食物，還親身到場與基金副主席施榮忻及委員共度一個快樂下午，卓妮當然把握機會訪問吓Martin再做爸爸嘅感受啦！
Martin甜絲絲說：「好開心囉！女兒改咗名叫『李晞兒』，爺爺同大伯（李家傑）都有送禮物畀晞兒，好似細路仔玩具、ＢＢ衫咁。」對於有堪輿學家指晞兒命格旺父親，Martin就話無搵師傅為女兒改名，只係同屋企人一齊傾個名出來：「其實『晞兒』都幾順口吖，改完大女叫晞彤，『晞兒』又順口又得意，幾可愛吖！」
抖夠再努力「造人」
要照顧多一名家庭成員，唔知Martin喺時間上會否緊張咗？做過爸爸果然唔同，Martin好有把握咁話：「咁又唔係緊張好多，因為個女始終仲細個，而且又有工人幫手。有咗第一個女嘅經驗，湊第二個自然容易好多，湊起上來都會順咗，反而輕鬆咗，當然將來唔知會點。如果個女乖啲，咪無壓力囉！」四叔曾經開口叫子淇最好生育到三十三歲，問Martin會否聽四叔話再追多個？Martin果然快人快語、實話實說：「都會嘅！唔係咁快囉，都要抖吓先。」睇怕李太仲要繼續努力，幫四叔追番個男孫至得。
施榮忻愛女入名校
除咗Martin有喜外，施榮忻亦開心到好似中頭獎，其愛女Victoria今年九月升小一，尋日獲分派到跑馬地聖保祿天主教小學，直屬中學為聖保祿中學，一條龍唔使再頭痛。榮忻大讚間學校好好，而且地理位置好方便；佢家住渣甸山，如果唔塞車，喺屋企五分鐘車程就返到學校嘞！
卓妮