藏毒咁大件事，功夫茶係咪吹牛呀？冇，絕對冇吹牛，因為有紅牛。事關政府證實驗出紅牛飲品含有可卡因，之但係又好奇怪，禁毒處冇下令禁售，市面上仍然可以輕易買到。換言之，你一不小心買咗一罐紅牛，就係藏毒！

其實更加奇怪嘅係，紅牛亞太區辦事處發表聲明，堅稱本港及其他亞洲地區出售嘅紅牛飲品不含可卡因，要求特區政府「認清錯誤」。

呢嗱嗱嗱，咁就令人百思不得其解嘞。一個話有可卡因，一個話冇可卡因，到底政府有冇驗錯㗎？最令人無所適從嘅係，即使當你冇驗錯，的而且確有可卡因，喂，你咪下令禁售囉，一律唔准賣，咁就乜都唔使煩。

你估禁毒處幾荒謬呢？佢哋冇話禁售，只係「勸喻」商戶唔好賣，另外「呼籲」市民唔好買，之但係，佢哋又聯絡警方部署行動，計劃以《危險藥物條例》去零售點搜查含有可卡因嘅紅牛飲品，將之充公以及提出檢控。

嘩！呢鋪真係大整蠱咯，分明掟塊蕉皮畀人踩。你又唔去檢控紅牛公司，你又冇明確指示禁止買賣，人哋合法入貨，然後合法銷售，你竟然又要拉又要鎖，講唔講得通呀？

難怪香港酒吧及卡拉ＯＫ業權益促進組主席譚振傑狠批政府推卸責任。講得啱，實實在在係推卸責任，禁毒應該去源頭禁吖嘛，政府咁把炮，去紅牛公司拉人封艇囉，點解要煩到無辜小市民呢？商戶正正經經入貨，冇呃冇騙冇逃稅，更加唔係蓄意販毒，你冇禁售之下走去充公兼檢控，簡直離晒大譜！

功夫茶仲有一樣嘢擔心，假設唔知邊個咁唔好彩畀禁毒處檢控，忽然之間，政府撥亂反正，哎吔，唔好意思，原來真係驗錯咗添，紅牛飲品確係冇可卡因嘅。如果係咁，被檢控嗰個咪好冤枉？

所以話啫，政府最最最緊要嘅係驗清驗楚，實牙實齒話畀全世界聽紅牛飲品到底有冇可卡因。有咯喎，禁售；冇咯喎，收聲！

唉，講到尾，呢個禁毒處都係搞笑㗎嘞。冇耐之前，佢哋搵咗一個幾乎日日吸毒嘅女藝人幫佢哋做禁毒大使，扮晒叉燒教人「不可一、不可再」，仲話「向毒品說不、向魔鬼說不」。跟手又整單紅牛事件，一邊話要「零容忍」，一邊又好大量咁容忍紅牛飲品繼續賣，引到男女老幼心思思，想去試吓「合法吸毒」，然後咯喎，禁毒處竟然又話要檢控商戶。呢啲，咪就係添煩添亂囉，既糊塗，又擾民！

計功夫茶話齋，禁毒處人員可能都係紅牛粉絲，飲到龍精虎猛飄飄然，所以唔捨得禁，不過為咗交差，惟有搵商戶做代罪羔羊。咦，政府突然又話另有樣本冇可卡因，玩嘢咩！

點都好啦，快啲走去驗屍咁驗，如果紅牛公司冇錯，即係特區政府衰咗，咁就麻煩禁毒處公開向所有擔心自己唔覺意吸過毒嘅市民道歉！