講開又講，孫太話依家香港有愈來愈多「無飯」家庭，即係餐餐出街食嘢唔喺屋企煮飯，佢個人好反對呢個風氣，覺得食住家飯既經濟又健康，一家人樂也融融食餐晚飯，仲對促進家人感情有好大幫助。早前孫太身體抱恙，幸好大步檻過，大病初愈，孫公為免佢過分操勞，特別請咗個印傭幫手煮飯執拾屋企，分擔過去一直由孫太做開嘅家務。不過佢堅持唔做「無飯煮婦」，每日煮乜飯、買乜餸，都係由佢親自操盤同落鑊，印傭只係負責執頭執尾，所以屋企嘅大廚，依然係孫太做番。

孫太話，喺屋企煮餐飯，其實唔係想像中咁辛苦；就算兩公婆都要返工都可以搞得掂。佢最近就諗緊整番個網誌，教大家煮住家飯，整番本孫家食譜；若然成事，就係全港無飯家庭之福！