錢果豐同周松崗尋日喺股東會上接受股東提問，陳婆婆搶先提問，質疑點解份年報提都唔提吓長者兩蚊搭車優惠會唔會延續落去。佢最搞笑係勁讚錢果豐同周松崗兩個人做得好好，由香港做鐵路做到去北京同外國，但轉過頭又質疑佢兩個冧莊再冧莊，究竟要連任幾多次？佢仲質問周總：去年公司派畀佢嗰批四十七萬股認股權，出年會唔會賣晒佢呢？

阿婆表面讚到錢、周配天上有、地下無，但同時又嫌佢兩位霸住個位好耐咁，直頭係綿裏藏針，認真難搞。周總一路沉默是金，任你點問都唔出聲。錢主席就好識氹老人家，話多謝佢賞識，仲開玩笑話，周總因為想見多婆婆兩面，所以已經續任兩年。

鬧鄭汝樺唔重視港鐵

佢跟手再幫周總解圍，話股東大會唔適合問賣認股權咁私人嘅問題；至於薪酬水平，全部都係由薪酬委員會決定，即係有規有矩，唔係鍾意點加都得。不過陳婆婆就唔肯輕易放過周總，見佢一句都無答，就直接問佢做乜唔答，然後仲順手鬧埋身為港鐵董事局成員嘅運輸及房屋局局長鄭汝樺，話董事局有四次開會，佢都係搵代表出席，根本唔重視呢份工！

周松崗畀阿婆逼到埋牆，最後都要開金口講番幾句，話好多謝婆婆關懷，仲同佢解釋話公司已經同佢續約。其實除咗陳婆婆妙語連珠外，同場亦有一位婆婆股民好激氣，猛鬧港鐵大學站月台空隙太大，搞到佢老公跌落條罅受傷，一番話搞到主席好尷尬。