經濟不景衝擊旅遊業，旅巴司機朱先生大嘆搵食艱難，更不滿運輸署落井下石，「早排載個客去旺角維景酒店，酒店門口竟然劃做禁區，逼住要喺馬路中間落客，啲客要拖住大包細包喺馬路穿插，係咪要有人畀車撞死先取消個禁區！」
正門上落客被檢控
朱又稱，早前有行家為方便旅行團的長者在正門上落客，即被交通警檢控，「依家市道唔好，想服務好啲但又驚畀人告，真係唔知點算好！」朱指已劃為停車禁區的酒店遍布九龍及新界，不少行家怨聲載道。
雖然大部分酒店均設有上落客區，但設計所限，大型旅巴未必可駛入，需於路旁上落遊客。記者走訪多間酒店發現，旺角維景酒店外的荔枝角道及太子道西均被劃為禁區，旅巴只能在砵蘭街上落客，遊客要拿着手提行李拉篋衝過馬路，險象環生。九龍維景酒店外的窩打老道同樣被劃為禁區，有旅巴甚至被迫在對面馬路上落客。至於沙田帝都酒店外的宜正里亦列為禁區，旅巴司機需在的士站前位置等候，遊客均要拖着行李「行成條街」。
立法會旅遊界議員謝偉俊直斥運輸署安排失當，「絕對唔係理想嘅待客之道！運輸署應該諗辦法，搵個安全嘅位畀遊客上落，點可以叫啲遊客咁危險喺馬路走嚟走去！」
對於當局以阻塞交通作為規劃禁區理由，謝則不予認同，「奧馬嗰陣沙田都封咗帝都出面條街畀專車做安檢，當時都冇塞到車，依家點解又唔可以彈性開放畀旅巴？」謝認為當局須盡快訂出改善措施，以免損害香港形象。
旅業遭殃香港蒙污
香港酒店業主聯會執行總幹事李漢城則認為，運輸署的做法未能平衡旅遊業及公眾利益，「運輸署應該了解吓邊個時間最多遊客出入，要寬限同有彈性咁處理，畀遊客可以安全上落車。」李擔心倘問題持續，香港將成為大輸家，「如果有遊客投訴，又或者有遊客出咗意外，絕對唔係香港之福！」
運輸署發言人指出，帝都酒店設有的士站，設立「不准停車」可避免造成擠塞；旺角維景酒店則因附近交通繁忙，故建議旅巴於砵蘭街上落；至於九龍維景酒店外的一段窩打老道，因應交通擠塞情況，已於去年將上午七時至下午七時劃為限制區。香港旅遊發展局發言人則稱，一旦接獲投訴，會向酒店了解並向政府部門反映。
■記者 李世華