消委會格價出晒名「鑽出血」，幾乎格到全城最深最底，消費品畀佢格過，真係渣都冇得剩。不過人稱「格價一姐」嘅消委會總幹事劉燕卿就自爆出外購物時唔格價！
尋日喺立法會撞到卿姐，講起唔少消費品近日出現「海嘯價」，卿姐都話有留意行情，但講到執平貨，原來佢並非專家。卿姐笑言消委會做咗全方位格價快將一年，每個禮拜都例必派人四出各區超市、雜貨店格價，日子有功連佢自己都精明咗。不過講到自己行街買嘢，佢鍾意睇啱就買，唔會左格右格，唔通卿姐荷包大把水唔多志在？
原來係因為冇時間喎，卿姐話格價其實好花時間，又要親自出馬，唔可以假手於人，所以私底下嘅卿姐絕非「密底算盤」。查實卿姐份工一眼關七，日日對住啲消費品，件貨值幾多佢心中有數喇，又點會呃到佢！
講番金融海嘯下消委會投訴情況如何，卿姐話相比○七年，○八年嘅投訴的確多咗至少幾千宗，估計係因為經濟不景，多咗失業人士以偷呃拐騙方式搵快錢都未定喎。佢亦讚賞港人醒咗，畀人搵笨後唔會啞忍，所以消委會近年收到嘅投訴夠晒古靈精怪。暑假將至，卿姐又順便醒咗個暑期錦囊畀畢業生，話呃錢陷阱依然層出不窮，其中呃人嘅星探公司仍然猖獗，金融陷阱亦唔少，佢提醒年輕人咪因為心急搵暑期工而任人魚肉喎。