港鐵行政總裁周松崗由地鐵年代做到依家，大大話話做咗五年幾，雖然任期唔算好長，但都見證咗幾條新鐵路落成，最成功就梗係搞掂兩鐵合併。周總今年已經五十有九，好多呢個年紀嘅前輩已經退咗休享受人生，不過港鐵董事局仲未肯畀周總休息住，尋日宣布委任佢續任兩年。
睇番周總嘅簡歷，佢五○年喺香港出世，六八年喺培正中學畢業，跟住就過去美國留學。佢後生時做過幾間外國大集團嘅話事人，港府早幾年搵人做地鐵公司行政總裁，獵頭公司就睇中佢，將佢帶返香港老家。
周松崗由○三年十二月一日開始做地鐵行政總裁，前年年底兩鐵合併，佢就繼續留任到依家。港鐵董事局好似好心急咁，尋日先啱啱六月一日，已經提早半年宣布決定再委任佢做多兩年，任期由今年十二月一日去到二○一一年十二月三十一日。
大家尋日一心諗住趁香港總商會訪京團北上，問吓身兼理事嘅周松崗對冧莊有乜回應，點知佢原來無隨團出發，唔知係佢太忙，定係想暫時遠離「總商會兵變」嘅是非呢？