本報早前獨家報道中環擦鞋匠李伯畀食環署驅趕嘅辛酸史，網上回響好大，立法會議員余若薇（Audrey）上月廿九日更主動去信食衞局局長周一鑊，要求食環署酌情發牌畀李伯，等佢繼續喺中環擺檔。尋日我哋去中環美利大廈附近停車場搵番李伯，佢好多謝Audrey幫佢爭取攞牌，仲要加多句：「不過最多謝都係你哋《東方日報》，唔係你哋報咗出嚟，都冇咁多人知！」雖然網上回響大，但李伯話迄今得一個立法會議員出面幫佢，佢相當知足，話有人幫已經覺得好開心，人數多寡唔係問題。
人間有情，出力幫李伯嘅仲有喺美利停車場泊車嘅一眾司機。原來食環署將李伯嘅搵食工具沒收後，一班司機大佬就買番個工具箱畀李伯，等佢可以繼續開檔。有網友提議李伯將檔口移師去佢佐敦舖頭外，有咩事可以照應，李伯感激之餘婉拒咗，事關唔捨得中環啲熟客！
喺中環擦鞋擦咗十幾年，李伯儲落唔少熟客，有啲仲係達官貴人；至於有邊啲人，佢話基於職業道德唔講得，只肯透露佢哋多數都係搵助手一次過拎幾對鞋嚟擦，有時會畀幾十蚊貼士，一百蚊都試過，但一年只得一兩次。李伯咁守得秘密，畀多啲都抵啦！