本文重點
香港總商會經過是非多多嘅理事會改選之後，尋日展開一連兩日嘅高層北京訪問團，多名事件主角都有隨團，包括低票連任理事嘅前自由黨主席田北俊、角逐連任副主席失敗嘅自由黨核心楊國琦、已退出自由黨嘅總商會立法會代表林健鋒（Jeffrey）、間接畀自由黨開除黨籍嘅李大壯、以及好大機會做下屆總商會主席嘅胡定旭，一聽個陣容就知道會好精彩。
分開飛冇特別原因？
好耐冇試過同兩名前黨友Jeffrey及李大壯同行嘅田少，尋日冇跟大隊一齊坐飛機上北京，唔知佢係有事提早自行北上，定係怕嗰四個鐘航程會好難捱呢？
不過Jeffrey同我哋講，好多總商會理事喺內地都有自己嘅生意，次次訪京都有人選擇分開飛，今次亦唔只係得田少一個唔同機，相信冇乜嘢特別原因。
佢又話無論之前改選發生乜事都好，依家都已經事過境遷，相信大家會同心協力為商會同商界做嘢，尋晚佢哋同中國國際貿易促進委員會核心舉行晚宴，氣氛亦好和諧，叫大家唔好多心。
訪問團今日會分別與國務委員劉延東同商務部部長陳德銘見面。