人稱「風水大狀」嘅前大律師公會主席陳景生（Edward）近日因為龔如心爭產案，再度成為各大報章新聞版紅人，代表陳振聰嘅陳大狀向來篤信風水，唔紅嗰件都唔着，一身「紅噹噹」造型已成為佢嘅標記，無論上庭打官司或現身馬場消遣，都徹底做個「紅衣男」！
陳大狀前日現身沙田馬場，為新馬「廟豐泰」打氣，卓妮定眼一望，恍如畀一道紅光射埋眼，皆因陳大狀成身紅到好似火太陽，上身一件玫瑰紅西裝再襯件帶點桃紅嘅恤衫，加埋腳上一對紅襪，真係冇人夠佢紅，連馬會大董陳南祿都畀佢吸引住，拍拍佢膊頭話：「你呢個Look係贏馬格局喎！」畀佢咁讚，陳大狀即時挺起胸膛好似行Catwalk咁步入賞馬圈。
卓妮第一時間追上前問佢有乜風水心得，大狀似乎唔多想洩露天機：「風水嘅嘢我唔係咁在行㗎咋！」呢招真人不露相，更加令人覺得佢高深莫測喎。
可惜跑馬都係講啲運，不管陳大狀如何發功，馬仔最後都係三甲不入。雖然輸咗馬，陳大狀信念不改，尋日上法庭打官司，繼續着紅襪打紅呔，但上身就改着深色西裝，恤衫亦改為白色，比入馬場嘅大放異彩打扮明顯收斂咗。要選香港紅男，卓妮認為非陳大狀莫屬也！
卓妮